छत्रपती संभाजीनगर, : डॉ.बाबासाहेब आंबेडकर मराठवाडा विद्यापीठाचा ६५ वा दीक्षांत समारंभास भारताचे उपराष्ट्रपती मा.जगदीप धनखड प्रमुख पाहुणे म्हणून उपस्थितीत राहणार आहेत. मा.कुलपती तथा राज्यपाल सी पी राधाकृष्णन यांच्या अध्यक्षतेखाली येत्या २२ फेब्रुवारी रोजी हा सोहळा संपन्न होणार आहे, अशी माहिती मा.कुलगुरु डॉ.विजय फुलारी यांनी दिली.
कुलगुरूपदाची सूत्रे डॉ.विजय फुलारी यांनी स्वीकारल्यानंतर त्यांच्या कारकिर्दीतील पहिलाच दीक्षांत समारंभ (६४ वा दीक्षांत समारंभ) १३ जून २०२४ रोजी विद्यापीठ नाटयगृहात घेण्यात आला. या सोहळयासाठी पुणे येथील ’सीएसआयआर - एनसीएल’चे संचालक डॉ.अशिष लेले हे प्रमुख पाहुणे म्हणून उपस्थित होते. या नंतर ६५ वा दीक्षांत समारंभ होणार आहे. या सोहळयासंदर्भात गुरुवारी (दि.२०) व्यवस्थापन परिषदेच्या कक्षात पत्रकार परिषद घेण्यात आली. यावेळी मा.डॉ.विजय फुलारी म्हणाले, यंदाच्या दीक्षांत समारंभाला उपराष्ट्रपती मा.जगदीप धनखड प्रमुख पाहुणे म्हणून उपस्थित राहणार आहेत. सोहळ्याचे अध्यक्षस्थान मा.कुलपती तथा राज्यपाल सी पी राधाकृष्णन भूषविणार आहेत. हा सोहळा येत्या २२ फेब्रुवारी दुपारी ३:२० वाजता विद्यापीठ नाट्यगृहात होणार आहे. कार्यक्रमास राज्याचे उच्च व तंत्रशिक्षण मंत्री मा.ना.चंद्रकांत दादा पाटील व माजी केंद्रीय अर्थ राज्यमंत्री तथा राज्यसभा सदस्य डॉ भागवत कराड यांना प्रमुख पाहुणे म्हणून निमंत्रीत करण्यात आले आहे. यावेळी कुलगुरु डॉ.विजय फुलारी, प्रकुलगुरु डॉ.वाल्मिक सरवदे, कुलसचिव डॉ.प्रशांत अमृतकर, परीक्षा व मुल्यमापन मंडळाच्या संचालक डॉ.भारती गवळी यांच्यासह चार विद्याशाखेचे अधिष्ठाता डॉ.महेंद्र शिरसाठ, डॉ.संजय साळुंके, डॉ.वैशाली खापर्डे, डॉ.वीणा हुंबे तसेच व्यवस्थापन परिषदेचे सर्व सदस्य यांची प्रमुख उपस्थिती राहणार आहे. पत्रकार परिषदेस समिती अध्यक्ष डॉ.कैलास पाथ्रीकर, डॉ मुस्तजीब खान, डॉ.संजय शिंदे यांची उपस्थिती होती. सोहळयासाठी एकूण ३० समित्यांची स्थापना करण्यात आली असून जवळपास दीडशे सदस्य कार्यक्रमाच्या यशस्वीतेसाठी प्रयत्नशील आहेत.
५६ हजार १२२ पदवीधारक
या दीक्षांत समारंभात ऑक्टोबर- नोव्हेंबर २०२३ व मार्च-एप्रिल २०२४ या परीक्षेत उत्तीर्ण पदवीधारकांना पदव्यांचे वितरण करण्यात येणार आहे. या दोन्ही परीक्षेत पदविका, पदवी, पदव्यूत्तर पदवी प्राप्त विद्यार्थी तसेच १४ जून २०२४ ते ८ फेब्रुवारी २०२५ या दरम्यान पीएच.डी प्राप्त करणा-या संशोधकांनी पदव्यांचे वितरण करण्यात येईल.यंदाच्या दीक्षांत सोहळयास पदवी प्राप्त करण्यासाठी एकुण ५६,१२२ विद्यार्थ्यांनी आवेदन पत्र दाखल केले आहेत. यामध्ये पदवीधर - ४२ हजार ६६६, पदव्यूत्तर पदवी १३ हजार १८७, एम.फिल धारक १६ व पीएच.डी. धारक १०६ जनांचा समावेश आहे. महाविद्यालयातील दीक्षांत समारंभ स्वतंत्र होतील. तर पदव्यूत्तर पदवी धारकांना संबंधित विभागात पदव्यांचे वितरण करण्यात येणार आहे, असे डॉ भरती गवळी यांनी सांगितले.
चार इमारतीचे भूमिपूजन
मा.उपराष्ट्रपती जगदीश धनखड यांच्या हस्ते पीएम उषा प्रकल्पातंर्गत चार इमारतींचे भूमीपूजन करण्यात येणार आहे. यामध्ये ’स्ट्रेस बस्टर रिक्रेशन फॅसिलीटी सेंटर’ (९ कोटी ४८ लाख), सेंटर फॉर फोक अ‍ॅण्ड कल्चरल स्टडीज ऑफ मराठवाडा (६ कोटी ६२ लाख), स्टूडंटस् फॅसिलीट इन लायब्ररी अ‍ॅण्ड रिडींग रुम (३ कोटी ७५ लाख) तसेच सेंटर फॉर डिजीटल ट्रासफॉर्मेशन (७ कोटी ७४ लाख) अशा चार इमारतीचे अभासी पध्दतीने मा.उपराष्ट्रपती यांच्या हस्ते भूमीपूजन करण्यात येणार आहे.
No comments:
Post a Comment