छत्रपती संभाजीनगर, दि.८ : डॉ.बाबासाहेब आंबेडकर मराठवाडा विद्यापीठाचा ६५ वा दीक्षांत समारंभ भारताचे उपराष्ट्रपती मा. जगदीप धनकडं यांची प्रमुख उपस्थितीत व मा.कुलपती तथा राज्यपाल सी पी राधाकृष्णन यांच्या अध्यक्षतेखाली येत्या २२ फेब्रुवारी रोजी संपन्न होणार आहे, अशी माहिती परीक्षा व मुल्यमापन मंडळाच्या संचालक डॉ.भारती गवळी यांनी दिली.
कुलगुरूपदाची सूत्रे डॉ विजय फुलारी यांनी स्वीकारल्यानंतर त्याच्या कारकिर्दीतील पहिलाच दीक्षांत समारंभ (६४ वा दीक्षांत समारंभ) १३ जून २०२४ रोजी विद्यापीठ नाटयगृहात घेण्यात आला. या सोहळयासाठी पुणे येथील ’सीएसआयआर - एनसीएल’चे (पुणे) संचालक डॉ.अशिष लेले हे प्रमुख पाहुणे म्हणून उपस्थित होते. या नंतर ६५ व्या दीक्षांत सोहळयास प्रमुख पाहुणे म्हणून दिलेले विद्यापीठाचे निमंत्रण भारताचे उपराष्ट्रपती मा. जगदीप धनकडं यांनी स्वीकारले आहे. तसा संदेशही मा. कुलगुरू यांना प्राप्त झाला आहे. हा सोहळा येत्या २२ फेब्रुवारी सकाळी ११ वाजता विद्यापीठ नाट्यगृहात होणार आहे. या सोहळ्याचे अध्यक्षस्थान मा.कुलपती तथा राज्यपाल सी पी राधाकृष्णन भूषविणार आहेत. तर राज्याचे उच्च व तंत्रशिक्षण मंत्री मा.ना.चंद्रकांत दादा पाटील यांना प्रमुख पाहुणे म्हणून निमंत्रीत करण्यात आले आहे. यावेळी कुलगुरु डॉ.विजय फुलारी, प्रकुलगुरु डॉ.वाल्मिक सरवदे, कुलसचिव डॉ.प्रशांत अमृतकर, परीक्षा व मुल्यमापन मंडळाच्या संचालक डॉ.भारती गवळी यांच्यासह सर्व विद्याशाखांचे अधिष्ठाता, व्यवस्थापन परिषदेचे सर्व सदस्य यांची प्रमुख उपस्थिती राहणार आहे. या सोहळयासाठी एकूण ३० समित्यांची स्थापना करण्यात येणार असून जवळपास दिडशे सदस्य यात आहेत. दरम्यान, या सोहळ्यानंतर महाविद्यालयांचे दीक्षांत समारंभ स्वतंत्र होणार आहेत.
पदवीधारकांना आवाहन
६५ व्या दीक्षांत समारंभात ऑक्टोबर- नोव्हेंबर २०२३ व मार्च-एप्रिल २०२४ या परीक्षेत उत्तीर्ण पदवीधारकांना पदव्यांचे वितरण करण्यात येणार आहे. या दोन्ही परीक्षेत पदविका, पदवी, पदव्यूत्तर पदवी प्राप्त करणा-यांनी येत्या ७ फेब्रुवारी पर्यंत परीक्षा विभागात आवेदनपत्र दाखल करावेत. तसेच १४ जून २०२४ ते ८ फेब्रुवारी २०२५ या दरम्यान पीएच.डी प्राप्त करणा-या संशोधकांनी देखील आवेदनपत्र दाखल करावेत, असे संचालक डॉ.भारती गवळी यांनी कळविले आहे.
No comments:
Post a Comment