किनवट,दि.२० : किनवट व माहूर तालुक्यात अतिवृष्टीमुळे झालेल्या पीक नुकसानीचे पंचनामे पूर्ण करून बाधित शेतकऱ्यांना हेक्टरी ५० हजार रुपये मदत तत्काळ द्यावी, अशी मागणी अखिल भारतीय किसान सभेतर्फे जिल्हा प्रशासनाकडे करण्यात आली आहे,अशी माहिती किसान सभेच्या राज्य शाखेचे उपाध्यक्ष अर्जुन आडे यांनी दिली.
ऑगस्ट महिन्यात संपूर्ण किनवट व माहूर तालुक्यात अतिवृष्टी झाली.या दोन तालुक्यातील काही मंडळाततर ढगफुटी झाली. नद्या, नाले, ओढ्यांचे पाणी शेतामध्ये शिरल्यामुळे संपूर्ण पिके उद्ध्वस्त झाली आहेत. बाधित शेतकऱ्यांना हेक्टरी ५० हजार रुपयांची मदत तत्काळ जाहीर करावी. पशुधन दगावलेल्या शेतकऱ्यांनादेखील मदत करावी. राज्य सरकारने पीकविमा योजनेत केलेले बदल तत्काळ रद्द करून केंद्र सरकारची पंतप्रधान पीकविमा योजना जशीच्या तशी लागू करावी.
येत्या एक महीन्याच्या आत बाधित शेतकऱ्यांना मदत न दिल्यास राज्य सरकार विरोधात तीव्र आंदोलन करू, असा इशारा अखिल भारतीय किसान सभेच्या वतीने अर्जुन आडे यांनी दिला आहे.
No comments:
Post a Comment