निवडणूक प्रचार शिगेला : उमेदवारांचा दारोदारी धडाका, मतदार त्रस्त!

 निवडणूक प्रचार शिगेला : उमेदवारांचा दारोदारी धडाका, मतदार त्रस्त!

किनवट, दि.२९ : किनवट नगरपरिषद निवडणुकीची रणधुमाळी शिगेला पोहोचली असून दारोदारी प्रचाराचा अक्षरशः धडाका सुरू आहे. “साहेब… मॅडम… दादा… ताई… मावशी… काका… बाहेर या!” असा गजर करत उमेदवार व त्यांचे कार्यकर्ते मतदारांच्या घरासमोर रांगा लावत आहेत. मत मागताना हात जोडून विनंती, नम्र हसू, आणि कधी कधी तर पाया पडण्याचे प्रकारही दिसत आहेत.

मात्र, या सगळ्यात मतदारांची मात्र चांगलीच दमछाक होत आहे.

कोणी अंघोळ करताना, कोणी स्वयंपाकाच्या मध्यात, तर कोणी कपडे धुताना—कामे अधांतरी ठेवून दार उघडण्याची वेळ अनेकांवर येत आहे. दिवसातून 8-10 नव्हे तर अर्ध्या अर्ध्या तासाने उमेदवारांचे थवे घरासमोर येत असल्याने नागरिक त्रस्त झाले आहेत.

उमेदवारांच्या मागे कार्यकर्त्यांची ताकद वेगवेगळी

कोणाच्या मागे ४०-५० कार्यकर्त्यांची फौज, तर कोणाच्या मागे दहा-पंधरा जण. काही उमेदवार तर मजुरीने माणसे लावून घोषणा देत गल्लीबोळात फिरताना दिसत आहेत. तर काही उमेदवार फक्त दोन-तीन विश्वासू कार्यकर्त्यांसह शांत पण सातत्याने मतदारांशी संवाद साधत आहेत.

सर्वांना होकार… पण मतदान कुणाला?

मतदार मात्र कुणालाही सरळ नकार न देता सर्वांना होकार देत आहेत.

“हो हो… पाहू…”, “हं… विचार करतो…” अशी उत्तरे देत अनेकजण उमेदवारांना परत पाठवत आहेत.

प्रत्यक्षात मतदानाच्या दिवशी बटन कोणत्या चिन्हावर दाबले जाणार, हे निकालाच्या दिवशीच स्पष्ट होणार आहे.

बहुपक्षीय लढत, वातावरण तापले

या निवडणुकीत भाजप, कॉंग्रेस, राष्ट्रवादी, माकप, शिवसेना, शिवसेना (उबाठा), राष्ट्रवादी (शरद पवार गट), एमआयएम तसेच अनेक अपक्ष उमेदवार रिंगणात उतरले आहेत.

बहुपक्षीय लढतीमुळे दारोदारी प्रचारात चुरस आणखी वाढली आहे. प्रत्येक पक्षाचा प्रयत्न एकच—मतदारांना आपल्याकडे वळवणे.

निवडणूक जवळ येत असल्याने परिसरात उत्साह, गोंगाट, घोषणा, गर्दी… सर्व काही वाढू लागले आहे. मतदार मात्र सांगत आहेत—

“प्रचार थोडा कमी… आणि कामकाज थोडे जास्त दाखवा!”