“संविधान हा आचरणाचा मार्ग – डॉ. गोणारकर : किनवट येथे संविधान दिन उत्साहात”

 “संविधान हा आचरणाचा मार्ग – डॉ. गोणारकर : किनवट येथे संविधान दिन उत्साहात”

किनवट, दि. २७ :

“भारताचे संविधान हे केवळ कायद्याचे पुस्तक नसून प्रत्येक नागरिकाला न्याय, आचरण आणि माणूसपणाची दिशा दाखवणारा मार्गदर्शक ग्रंथ आहे,” असे प्रतिपादन स्वामी रामानंद तीर्थ मराठवाडा विद्यापीठाच्या माध्यम संकुलाचे संचालक प्रो. डॉ. राजेंद्र गोणारकर यांनी केले. विद्यापीठाच्या कै. उत्तमराव राठोड आदिवासी विकास व संशोधन केंद्र, किनवट येथे संविधान दिनानिमित्त आयोजित कार्यक्रमात ते प्रमुख पाहुणे म्हणून बोलत होते.

कार्यक्रमाच्या अध्यक्षस्थानी प्रो. डॉ. मार्तंड कुलकर्णी होते. संविधान प्रास्ताविकेला पुष्पांजली अर्पण करून आणि प्रास्ताविकेचे सामूहिक वाचन करून कार्यक्रमाचा प्रारंभ झाला.

पुढे बोलताना डॉ. गोणारकर म्हणाले, “संविधान दिन हा केवळ उत्सव नाही तर आचरणाचा दिवस आहे. संविधानातील मूल्ये प्रत्यक्ष आयुष्यात उतरविणे हे प्रत्येक नागरिकाचे कर्तव्य आहे.”

औंढा नागनाथ येथील प्रो. डॉ. सुरेश शेळके यांनी संविधान निर्मितीची प्रक्रिया, त्यामागील दूरदृष्टी आणि आजच्या काळातील संविधानाचे महत्त्व स्पष्ट केले. “मूलभूत अधिकार आणि कर्तव्यांचे पालन युवकांनी मनापासून करावे व ते समाजात प्रसारित करावे,” असे त्यांनी आवाहन केले.

अध्यक्षीय समारोपात डॉ. कुलकर्णी यांनी संविधानाबद्दल आदर आणि कृतज्ञता बाळगणे ही नागरिकांची जबाबदारी असल्याचे अधोरेखित केले.

कार्यक्रमाचे सूत्रसंचालन प्रा. डॉ. प्रवीण खंडागळे यांनी केले, तर सह-समन्वयक डॉ. सुनील व्यवहारे यांनी उपस्थितांचे आभार मानले. प्रास्ताविकेचे वाचन प्रा. श्रीराम पवार यांनी केले.

कार्यक्रमास प्रा. प्रीती देवस्थळे, डॉ. प्रमोद राठोड, प्रा. चेतन जाधव, रमेश जकुलवार, विठ्ठल हंबर्डे, राजू जाधव, सुनील टेकाम यांच्यासह विद्यार्थी व कर्मचारी मोठ्या संख्येने उपस्थित होते.